Makaalarma ang resulta sang isa ka recent survey sa syudad sang Iloilo nga nagapakita nga madamo sa gihapon sa mga pumuluyo ang wala nagapati nga malatnan sila sang viral disease nga COVID-19.
Ini ang pahayag sang City Health Office may kaangtanan sa ginconduct nga Random Access Consultants Incorporated (RACI) survey sang nagligad nga semana sa 200 ka respondents sa nanuhay-tuhay nga distrito sa syudad, nagaedad 18-60 anyos, kag kalabanan ang yara sa lower-income class.
Katunga sa sini nga numero ang nagpahayag nga mga tigulang lang kag kabataan ang mahimo ma-infect sang nasambit nga balatian.
Suno kay Dr. Roland Jay Fortuna, COVID-19 team focal person sang Iloilo City Government, ang nasambit nga age bracket sang mga
respondents nga wala nagapati nga mainfect sila sang COVID-19 amo mismo ang mga edad nga may mga record sang positive cases sa syudad.
Pahanumdom sang natungdan, wala sang ginapili nga edad ang nasambit nga virus.
Tanan suno sa iya nga wala nagasunod sa minimum health protocols ang may risgo nga matapikan sang COVID-19.
