ILOILO CITY– Mahimo makakuha sang Covid Benefits ang mga empleyado nga apektado sang pandemya pribado man ukon sa publiko nagatrabaho, pinaagi sa Employees Compensation Commission.
Sa interview sang Bombo Radyo kay Stephen Barredo, Regional Incharge sang Employees Compensation Commission, iya ginpahayag nga subong nga tion sang pandemya, may yara sila sang ihatag nga Covid 19 benefits kag iban pa nga benepisyo kaangay sang loss of income benefits, death and funeral benefits.
Suno kay Barredo, sa bahin sang Covid benefits, mahimo makabatun sang bulig ang mga frontliners nga nalatnan sang Coronavirus Disease 2019 bangud sa pagtungod nila sa ila trabaho sa diin basehan diri ang resulta sang real-time reverse transcription polymerase chain reaction (RT-PCR) test.
Magahatag sila suno kay Barredo sang P10,000 tubtob P15,000 nga financial assistance sa mga frontliners nga nagpositibo sa nasambit nga balatian.
Sa bahin naman sang pagproseso sang benepisyo suno sa natungdan, kun yara pa sa quarantine ang benipesyaryo, mahimo makig-angot sa ila ang Human Resource sang kumpaniya ukon sa tion nga mag-ayo na ang pasyente, mahimo man nga siya personal ang magproseso sa iya benepisyo pinaagi sa Social Security System, kag Governent Service Insurance System.
