ILOILO CITY- Nagahilibion samtang nagapangayo sang pasaylo ang 40 anyos nga lalaki nga taga- Mansaya, Lapuz, Iloilo City nga nagpositibo sa coronavirus disease 2019 apang naghampang pa sang basketball, nag- inom, nagpa- manicure kag nagtambong pa sa lubong.
Sa exclusive interview sang Bombo Radyo kay alyas “Jong-Jong” nga amo si WV #227 , iya ginpahayag nga dako gid ang iya paghinulsol bangud wala ini nagpaidalom sa rapid test sa iya pagpauli sa Syudad sang Iloilo.
Suno kay Jong-Jong, nagsalig ini nga wala siya sang covid infection bangud nagnegatibo man ang resulta sang iya rapid test sang naghalin ini sa Metro Manila.
Pahayag niya, ini man ang rason kun ngaa wala na niya ginpahibalo ang tuhoy sa iya pag-abot sa mga opisyales sang Barangay Ingore, Lapaz kun sa diin siya nagtinir.
Nahibaluan nga matapos natukiban nga nagpauli ini sa Ingore, Lapaz, ginpaidalom ini sa rapid test sa diin positibo ang resulta kag sang ginpaidalom naman sa Reverse Transcription Polymerase Chain Reaction Test , liwat ini nga nagpositibo.
Dako naman ang pagpasalamat ni Jong- Jong sa Bombo Radyo nga nangin palaagyan agud makapabutyag siya sang iya paghinulsol kag pagpangayo sang pasaylo kay Mayor Jerry Treñas, sa mga barangay officials, kag sa iya pamilya.
Samtang, apisar nangayo sang pasaylo si Jong-jong, ginpahayag naman ni Iloilo City Mayor Jerry Treñas nga may salabton ini sa gihapon sa layi.
Suno kay Treñas, dapat nga mangin leksyon ini sa tanan bangud kun sulit-sulit lang ang kaangay nga hitabo, mabudlayan ang syudad nga matapna ang covid-19.
