ILOILO CITY- Tinguhaan sang contractor sang ginatukod nga foot bridge sa Esplanade 3 nga matapos ang proyekto subong nga bulan.
Ini agud nga makuha na ang crane way ukon ang gintampok nga bato kag gintungtungan sang duta nga ginaagyan sang mga equipment sa ginapatindog nga proyekto sa Dungon creek.
Kasunod ini sang kahangawa sang publiko nga may matuga nga halit ang nasambit nga craneway kaangay sang siltation kag pagpugong sang ilig sang tubig sa creek.
Sa interview sang Bombo Radyo kay Engr. Matt Madrillo sang FG Construction nga contractor sang proyekto, iya ginpahayag nga may yara sang tamburong ang crane way gani may mahimo nga maagyan ang tubig.
Suno sa iya, ginsanto man nila ang pagtukod sang proyekto subong nga tig-ilinit agud nga mangin tayuyon ini.
Pahayag niya, kon mag-ulan gid man kag indi makalusot ang tubig sa crane way, may nakahanda man nga mga equipment agud kwaon gilayon ang crane way.
Nahibaluan nga nagdangat sa P70 million ang ginpain nga pondo a para sa nasambit nga foot bridge sa Esplanade 3.
Ini nagalapad sang tres metros kag nagalaba sang 50 metros kag kabahin sang pagkonekta sa tanan nga esplanade sa Syudad sang Iloilo.
