ILOILO CITY – Gintapos sang Creamline Cool Smashers ang eliminations sang Premier Volleyball League All-Filipino Conference bilang top seeded team matapos nga ginlutos ang Akari Chargers sa hampang nga ginhiwat sa University of San Agustin Gymnasium sa Iloilo City.
Wala ginpasugtan sang Cool Smashers nga maka-abanse ang Akari nga na-eliminate na antes pa man ang hampang kagab-i, sa score nga 25-17, 25-22, 27-29, 25-8.
Ang Cool Smashers ang magasulod na sa semifinals nga may 7-1 record kag yara sa number 1 spot samtang ang Chargers ang nagtapos sang ila stint sa conference nga may 2-6 slate.
Ginpangunahan ni Michele Gumabao ang defending champions sa score nga 19 points samtang 17 kag 16 points naman ang ginbulig nanday Jema Galanza kag Tots Carlos.
Ang Cool Smashers star nga si Alyssa Valdez nga yara man sa venue ang wala nakahampang bangud nga nagapadayon pa ang recovery nagikan sa injury.
Samtang, sulod naman sa semifinals ang Petro Gazz Angels matapos nga ginlutos ang Chery Tiggo Crossovers sa score nga 25-21, 28-26, 25-21.
Bangud sini, ang Petro Gazz ang may 6-2 win-loss card, nga pareho sa F2 Logistics apang nagapangaduha lamang sa Creamline Cool Smashers.
Ang Chery Tiggo naman ang nagbiya sa competition nga may 4-4 slate.
Antes kagab-i, ulihi nga ginhiwat ang Premier Volleyball League sa Iloilo City sang Oktubre 5, 2019 nga nag-feature sang Angels-Pacific Town Army Lady Troopers kag Cool Smashers-Choco Mucho Flying Titans encounter sa pareho man nga venue.
