Kasunod sang pag-kampyeon sa Premier Volleyball League (PVL) Invitational Conference, ginbaton sang Creamline Cool Smashers ang imbitasyon sa pagtiglawas sang Pilipinas sa nagahilapit nga 2022 Asian Women’s Volleyball Cup (2022 AVC Cup for Women).
Ang Pilipinas man ang maga-host sang nasambit nga hinampang sa PhilSports Arena sa Pasig umpisa sa Agusto 21.
Kahapon lang, Agusto 14, sang ginlutos sang Creamline ang KingWhale Taipei sa PVL Invitational Conference final, 25-21, 25-19, 25-8, sa Mall of Asia Arena.
Diskusyunan pa ang roster sang Creamline para sa kumpetisyon.
May 14 players ang Creamline nga naka-line up para sa PVL, apang 12 lang ang ginapahanugutan sang AVC Cup.
Yara sa Pool A ang Pilipinas kun sa diin atubangon sini ang China, Iran, South Korea, kag ang Vietnam.
Sa Pool B naman amo ang Australia, Chinese Taipei, Japan, Kazakhstan, kag Thailand.##
