Apisar wala nakahampang ang three-time Most Valuable Player (MVP) nga si Alyssa Valdez, nadepensahan sang Creamline Cool Smashers ang korona sa 2023 Premier Volleyball League (PVL) All-Filipino Conference matapos ginlutos ang long-time rival nga Petro Gazz Angels sa do-or-die Finals Game 3, 20-25, 25-20, 25-18, 25-15.
Ini ang una nga bes nga wala si Valdez sa finals apang ginpamatud-an sang Creamline sa atubang sang masobra 12,000 ka fans nga ila ang korona sa pagpanguna sang wing spikers nga sanday Tots Carlos, Michele Gumabao, kag Jema Galanza.
Sa ikatatlo na nga tion, ginkilala ang former University of the Philippines (UP) standout nga si Carlos bilang PVL MVP nga pareho na sa rekord sang iya teammate nga si Valdez nga may tatlo man ka PVL MVP awards.
Ang Best Outside Spikers amo sanday Carlos kag Galanza; Best Opposite Spiker si Gumabao; Best Setter si Jia De Guzman; Best Middle Blockers sanday Remy Palma kag MJ Philips; samtang Best Libero naman si Kath Arado.
Ini na ang ika-anum nga overall PVL championship title sang Cool Smashers sa sulod sang walo ka tuig.##
