ILOILO CITY- Ginapasiguro ni Senate Minority Leader Franklin Drilon nga mangin dako nga bulig sa ekonomiya sang pungsod kon mangin layi na ang Corporate Recovery and Tax Incentives for Enterprises (CREATE) bill.
Sa interview sang Bombo Radyo sa Ilonggo Senator, iya ginpahayag nga kon basehan ang mga probisyon sang hagna, pat-ud nga makabenipisyo gid ang mga Filipino ilabi na nga nag-antos sang dako ang pungsod bangud sa ginapangatubang nga COVID-19 pandemic.
Suno kay Drilon, dako nga alibyo ini sa mga negosyante bangod panubuan ang corporate income tax rate sa 25% gikan sa 30% para sa mga dalagko nga kompaniya kag magapanubo man sang corporate income tax sa 20% para sa micro, small, and medium enterprises nga may net taxable income nga mas manubo sa P5 million kag total assets nga mas manubo sa P100 million.
Pila pa gid ka probisyon sang CREATE bill amo ang:
-Value-added tax (VAT) exemption threshold para sa socialized kag low-cost housing sa P2.5 million kag P4.2 million para sa house and lot
-VAT exemption para sa bulong sa cancer, mental illness, tuberculosis, kag balatian sa kidney
-VAT-free importation kag pagbaligya sang COVID-19 medicines kag PPEs umpisa sa Disyembre 31, 2023
-kag reduced preferential tax rates gikan sa 10 percent panaog sa 1 percent para sa non-profit hospitals kag educational institutions epektibo Hulyo 1, 2021 tubtob Hunyo 30, 2023.
Nahibaluan nga ginahulat na lang nga mapirmahan ni Presidente Rodrigo Duterte ang nasambit nga hagna matapos ginratipikahan sang kongreso ang final version sini sang nagligad nga semana.
