Ginabasehan ang political stability, macroeconomic stability, legal and regulatory environment, kag talento ukon abilidad agud makaganyat sang mga foreign investors ang isa ka pungsod.
Sa interview sang Bombo Radyo kay Atty. Joey Mondero, iya ginpahayag nga ang nagapanguna nga problema sang pagnegosyo sa Pilipinas amo ang logistics, infrastructure, kag regulatory environment.
Indi man tupong ang regional development sa bilog nga pungsod bangud ang National Capital Region kag malapit nga mga probinsya lamang sa Luzon ang makabaton sang pinakadako nga tax incentives.
Sa pagkamatuod suno kay Mondero, ulihi na ang Pilipinas sa mga kaingod nga Association of Southeast Asian Nations (ASEAN) countries sa pihak sang paghatag sang wala untat nga tax incentives.
Suno kay Mondero, ini nga mga problema ang amat-amat man nga ginasolusyunan sang gobyerno pinaagi sa mga nanuhay-tuhay nga programa.
Ini nga mga programa amo ang Build, Build, Build, Ease of Doing Business Law, kag Corporate Recovery and Tax Incentives for Enterprises ukon CREATE bill.
Ginpahayag ni Atty. Mondero nga katuyuan sang CREATE bill nga solusyunan ang tax incentives system sang pungsod.
Sa idalom sang CREATE bill, makaangkon sang incentives nga mas nasanto sa pag-obra sang trabaho, paghatag sang importante nga training, research kag development sa pagnegosyo.
Maga-angkon man sang gahom ang gobyerno nga maghatag sang tax incentives nga santo sa kinahanglan sang mga investor.
Magluwas diri, panubuon man sang CREATE bill ang corporate income tax humalin sa 30% tubtob 25% subong nga tuig kag 1% kada tuig umpisa tuig 2023 tubtob 20% sa tuig 2027.
