𝗜𝗟𝗢𝗜𝗟𝗢 𝗖𝗜𝗧𝗬 — Nagapabilin nga sirado ang ginareklamo sang mga residente nga creek sa Zone 6, Brgy. Bito-on, Jaro, Iloilo City.
Ini kasunod man sang pagtampok sang pribado nga nagapanag-iya sa pila ka porsyon sang creek.
Sa interview sang Bombo Radyo kay Elsa Olmido, isa sa mga naapektohan nga residente, iya ginpahayag nga matapos nga ginwaragwag sang Bombo Radyo Iloilo sa kahanginan ang problema, gilayon nga gin-backhoe ang pader agud nga mabutangan sang alagyan ang tubig.
Apang magamay lamang nga kanal ang ginkotkot kag nagapabilin sa gihapon nga yara ang pader sa creek.
Suno kay Olmido, sila sa gihapon ang nagasalo sang tubig-baha bangud masami na nga nagasaka ang tubig sa ila sugod sang ginsirado ang amo nga porsyon sang creek.
Ginpahayag man sini nga dapat wala gintampokan ang creek agud madasig nga naga-flow ang tubig-baha ilabi na subong nga tig-ululan.
Kun balikan, anay na nga nagpadulong ang punong barangay sa amo nga lugar agud sekyaron ang creek kag nakadependi na lamang sa barangay kon ano ang ila masarangan nga mahatag nga solusyon.
Nahibaluan nga ang pader ang rason kon ngaa nangin mahinay ang flow sang tubig kag nangin kabangdanan man sa pag-gamay sang creek.
Nagalaum naman ang mga residente nga mahatagan sila sang igtalupangod sang city government agud gilayon nga masolusyunan ang ila problema sa baha.
