Patay ang isa ka 24-anyos nga lalaki matapos na-trap sa sunog sa isa ka talyer sa Barangay Balabago, Jaro, Iloilo City kaina sang kaagahon.
Ang biktima amo si Rustom Ancita nga graduate sang Criminology sa University of Iloilo kag naga-preparar na kuntani sa pasinawan.
Sa interview sang Bombo Radyo kay Punong Barangay Antonio Jacoba, iya ginpahayag nga sandig sa iban nga mga pumuluyo sa lugar, may nabatian sila nga naglupok kadungan sang sunog.
Suno sa opisyal, nakaguwa man sa balay ang iban nga mga utod sang biktima, apang posible nga naulihi ini bugtaw bangud sa separado man ini nga tululugan.
3:12 a.m. sang ginpasaka ang first alarm status, 3:38 a.m. sang gindeklarar nga fire under control, kag 3:53 naman sang dalayon nga napalong sang mga bombero ang sunog.
PAHAYAG SANG AMAY
Sa interview naman sang Bombo Radyo sa amay nga si Lito Ancita, amay sang biktima, iya ginpahayag nga halin pa sa Antique ang iya anak kag may kaugalingon naman nga pamilya.
Pahayag sini, gab-i na siya nakapauli kagab-i, kag namurag-muragan lang ini kaina sang kaagahon sang ginpukaw siya nga nasunog na ang ila nga talyer.
Dugang sini, sa atop sang ila balay naghalin ang kalayo. Posible suno sa iya nga kuryente ang rason sang sunog ilabi na bangud may power interruption kahapon.
Magluwas sa ila talyer, may mga nasunog man nga motor, generator, kag iban pa nga kagamitan.
Gina-imbestigaran pa sang awtoridad kun ano ang ginhalinan sang insidente.#
