Nagnubo sang 7.2% ang crime rate sa bug-os nga Western Visayas kun basehan ang una nga lima ka bulan ukon ang Enero-tubtob Mayo 2024 nga report sang Police Regional Office (PRO) VI.
Sa interview sang Bombo Radyo kay Police Lt. Colonel Arnel Solis, spokesperson sang PRO VI, iya ginpahayag nga yara sa 4,820 ka mga krimen nga nagluntad sa amo nga period subong nga tuig nga mas manubo sa 5,194 nga amo nga tion sang 2023.
Lakip diri ang walo ka specific crimes ukon focus crimes bangud sa ila severity (murder, homicide, physical injury, rape, robbery, theft, motor vehicle theft, and motorcycle theft) sa diin may yara sang 958 ka mga kaso ipaanggid sa 1,197 sang nagligad nga tuig.
Ang index nga mas seryoso kag may impact sa public safety ang may 19.88% nga buhin — halin sa 1,202 sang 2023 panubo sa 963 sang 2024. Sa pihak nga bahin, nagnubo sang 3.38 percent ang non-index crimes kaangay sang illegal drugs kag gambling.
Nagapati ang PRO VI nga resulta na ini sang mas madamo nga personnel sa field kag sa strategic areas kag sa bulig man sang local government units, force multipliers, advocacy support groups, kag iban pa nga nagabulig sa otoridad para mapabilin ang kalinong sa rehiyon.
