ILOILO CITY – Nagnubo ang crime statistics sa Western Visayas humalin sang Enero 1 tubtub Agusto 31 subong nga tuig.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga 27.08% ang pagnubo sa crime statistics subong nga 2020 kun ipaanggid sang nagligad nga tuig sa kaangay nga binulan.
Suno kay Malong, humalin sang Enero 1 tubtub Agusto 31 sang 2019, nakarekord sila sang 19, 376 ka mga krimen.
Ini ang mas mataas kun ipaanggid sa subong ng tuig sa diin nagdangat lang sa 14, 128.
Kun pahat-pahaton, sa peace and order index, may 34.12% nga pagnubo sa diin sang nagligad nga tuig, nakarekord sang 2,705 apang sa subong may ara na lang sang 1,782.
Sa public safety index naman, may 27.08% nga pagnubo sa diin sang nagligad nga tuig, nakarekord sang 19,376 apang sa subong may ara na lang sang 14,128.
Sa focus crime, partikular ang murder, may gamay nga pagnubo sa diin sang nagligad nga tuig, nakarekord sang 315 apang sa subong may ara na lang sang 302.
Ginpahayag ni Malong nga lakip sa mga rason sa pagnubo sang krimen amo ang ginapatuman nga quarantine kag liquor ban.
