Iloilo – Nagsaka sang 27.09% ang crime volume sa Western Visayas sang tuig 2022.
Sa data sang Police Regional Office 6, may yara sang 22,507 ka mga crime incidents sang 2022 nga mas mataas kun ipaangid sang 2021 nga may yara sang 17,710.
Sa interview sang Bombo Radyo kay Police Major Mary Grace Borio, spokesperson sang nasambit nga talatapan, iya ginpahayag nga ang narekord nga mga krimen ang nagikan sa nagkalain-lain nga mga syudad kag probinsya sa Rehiyon 6.
Yari ang breakdown sang numero sang krimen nga narekord sa kabug-usan nga Western Visayas sa bulan sang Enero tubtob Disyembre 2022.
- Probinsya sang Iloilo – 6,683
- Iloilo City – 4,743
- Negros Occidental – 4,300
- Capiz- 2,331
- Bacolod city -1,357
- Aklan- 1,367
- Antique – 1,174
- kag Guimaras – 552.
Nakasentro naman ang mga kapulisan sa 8 focus crimes kaangay sang murder, homicide, physical injury, rape, robbery, theft, carnapping sa mga salakyan kag motor.
Suno kay Borio, may yara man sang pagtaas sa pagdakop sa mga durugista sa rehiyon kun sa diin nadakpan ang 1,900 ka mga indibidwal.
Sa numero nga ini, wala sang may narekord nga napatay sa ginpatigayon nga drug buy bust operation suno sa opisina.
Nagalaom naman ang natungdan nga mag-surrender na ang mga durugista agud mahatagan sang panibag-o nga kabuhi kag tsansa nga makaupod ang ila pamilya.
