ILOILO CITY – Nagalaum ang alkalde sang Sta. Barbara, Iloilo nga indi na madugangan pa ang na-infect sang Coronavirus Disease 2019 (COVID-19) sa ila nga banwa.
Ini kasunod sang narecord nga casualty nga naggikan sa amo nga banwa nga amo si WV 336,52 anyos sa diin na-infect man ang iya 49 anyos nga tiayon nga amo si Patient no. 724 kag ang 8 ka tuig nila nga anak nga amo si Patient no. 723 nga lunsay asymptomatic.
Sa interview sang Bombo Radyo kay Mayor Rema Somo, iya ginpahayag nga sa subong, nagapabilin nga naka-home quarantine ang iban nga family members lakip na ang duha ka kabulig sa balay nga nagnegatibo naman sa COVID-19.
Ang 13 ka mga shop kag store helpers sa Glass and Aluminum Supply nga ginapanag-iyahan sang napatay nga pasyente ang lunsay nakatapos na sang 14-day mandatory quarantine period kag wala nakitaan sang sintomas sang COVID-19.
