Ginahikutar na sang Iloilo City Social Welfare and Development Office (CSWDO) ang mga dokumento kag rekisitos agud nga mahatagan sang financial assistance ang mga naapektohan sang sunog sa Brgy. San Pedro, Molo, Iloilo City.
Sa interview sang Bombo Radyo kay Teresa Gelogo, Head sang Iloilo City Social Welfare and Development Office, iya ginpahayag nga padayon ang paghatag sang mga food packs kag non-food items sang syudad kag sang Department of Social Welfare and Development (DSWD) sa mga nasunogan.
Suno kay Gelogo, nagpadulong man ang pila ka mga city councilors sa evacuation centers agud nga maghatag sang bulig kag mag-check sang sitwasyon sang mga apektado.
On-going man ang community pantry sang evacuation centers kag padayon ang pagluto sang mga pagkaon aga man ukon sa gab-i.
Nagpasalig man ang natungdan nga makabaton sang financial assistance ang 71 ka mga balay na totally burned kag 6 ka mga partially burned.
P10,000 ang mabaton sang totally damaged nga balay samtang P7,000 naman sa mga partially damaged.
Nahibaluan nga naglab-ot sa P3.6 million ang balor sang kahalitan nga natuga sang sunog sa nasambit nga lugar.
