𝗜𝗟𝗢𝗜𝗟𝗢 𝗖𝗜𝗧𝗬 — Ginahikotar na sang City Social Welfare and Development Office (CSWDO) ang mga pamilya nga nagub-an sang panimalay bangud sa mabaskog nga balod sa mga coastal barangay sang Arevalo kag Iloilo City Proper.
Sa interview sang Bombo Radyo kay Teresa Gelogo, head sang Iloilo City Social Welfare and Development Office, iya ginpahayag nga may yara sang 32 ka mga panimalay ang na-rekord nga naguba sa 15 ka mga barangay sa area sang Arevalo kag Iloilo City Proper.
Suno kay Gelogo, masami kag nangin bastante sila sa pagpahanumdom sa mga residente ilabi na kon may mga kalamidad kaangay na lamang sang bagyo.
Ginpahayag man sini nga kalabanan sa mga panimalay nga naguba amo ang sa Brgy. Boulevard, Molo kon sa diin 15 gid ka mga panimalay ang totally damaged bangud sa balod.
Temporaryo naman nga naka-evacuate sa isa ka eskwelahan ang pamilya nga apektado sang malain nga tyempo.
Nahibaluan nga hatagan sang P10,000 nga cash assistance ang pamilya nga totally damaged ang balay, samtang P7,000 naman para sa partially damage nga balay.
Padayon paman ang pagpanglista sang talatapan sa mga posible naapektohan pagid agud nga gilayon mahatagan sang bulig.
Sa subong, ginapasigurado sang CSWDO nga may yara sang bastante nga supply sang pagkaon ang mga evacuees.
