ILOILO CITY – Wala ginadula sang City Social Welfare and Development Office (CSWDO) ang posibilidad nga may yara sang sala sa findings sang Commission on Audit (COA) tuhoy sa ginapanagtag nga social pension sa syudad sang Iloilo.
Ini ang may kaangtanan sa ginapabalik nga kapin sa P2 million nga social pension sa diin 420 ka mga non-eligible pensioner ang nakabaton sang kwarta.
Sa interview sang Bombo Radyo kay Cherry Lyn Bermejo, focal person sang CSWDO, iya ginpahayag nga mahimo nga may yara sang discrepancy sa COA findings.
Sa nagapadayon nga counter-checking sa payroll, ginpahayag ni Bermejo nga ang pinakamataas nga kantidad nga nabaton sang pensioner ang nagalab-ot lang sa P3,000 apang sa COA findings, nagalab-ot sa P4,500 ang pinakamataas nga kantidad nga nabaton sang social pensioners.
Ginpahayag man sang natungdan nga ang mga barangay official nga nalakip sa listahan sang social pensioner ang sadto anay indi pa elected officials.
Bangud sini, may yara sang patigayunon nga community assembley sa Hunyo 4 tubtub 11 agud nga matun-an kag mahibalu-an kun ano ang sala.
