Nagpahanumdom ang Iloilo City Social Welfare and Development Office sa mga ginikanan ukon guardian nga indi gid pagpabay-an nga makabuya ukon magseparar sa ila ang ila kabataan sa tunga sang madamo nga tawo sa Dinagyang Festival celebration.
Sa interview sang Bombo Radyo kay Terese Gelogo, head sang Social Welfare and Development Office, iya ginpahayag nga ini agud nga malikawan nga may marecord nga kabataan nga madula sa tunga sang pagkinasadya bangud mangin traumatic ang ini nga eksperyensiya para sa ila.
Apang suno kay Gelogo, preparado sila sa sini nga scenario ilabi na nga naandan na nga nagakatabo ini.
Pahayag niya, may yara sila sang ipahamtang nga activity center sa Plazoleta Gay kun sa area malapit sa Freedom Grandstand sa diin dal-on ang kabataan nga madula agud mahapos nalang nga kadtuan sang ginikanan ukon guardian.
Dugang niya, kun indi gilayon ma-claim ang bata, dal-on ini sa ila facility sa Crisis Intervention Unit sa Molo agud didto anay patiniron kag atenderon.
Gin-athag naman ni Gelogo nga naka-deploy man ang tanan nila nga mga staff sa mga areas sa palibot sang syudad agud tungdan ang ila responsibilidad ilabi na sa pagbantay sang kaayuhan sang kabataan kag publiko.
