ILOILO CITY – Tuman nga ginkasubo sang mga pumuluyo sang Brgy. Ortiz, Iloilo City Proper ang pagkasunog sang ila panimalay.
Sa interview sang Bombo Radyo kay Punong Barangay Shiela Dosa, iya ginpahayag nga sya mismo ang nasunugan man kag wala sang anuman nga gamit nga nadala.
Suno kay Dosa, naglumpat nalang sila sa dagat bangud tuman na kadako ang kalayo kag indi na sila makagwa sa ila balay.
Nahibaluan nga ginabanta sa masobra sa 60 ka mga pamilya ang nasunugan sang panimalay sa nagluntad nga sunog,
Samtang, nakahanda naman nga magpalab-ot sang bulig ang City Social Welfare Development Office sa mga pumuluyo nga nasunugan.
Sa interview sang Bombo Radyo kay City Social Welfare Development Officer 1 Sara Panelo, iya ginpahayag nga ginafacilitate na nila ang tanan nga mga pumuluyo nga nasunugan agud mahibaluan kun pila ang ila hatagan sang ayuda.
Suno kay Panelo, makabaton sang cash assistance nga ginabanta sa P10,000 ang mga nasunugan lakip man ang food assistance.
Dugang sang natungdan, tsekyaron man nila nga masaylo sa evacuation center sa isa ka pribado nga unibersidad sa syudad ang tanan nga mga pumuluyo.
