Nakatalana nga ipaidalum sa psychological test sang Iloilo City Social Welfare and Development Office (CSWDO) ang duha ka mga bata nga nakit-an matapos ang masobra 20 ka oras nga nadula sa Brgy. Baldoza, La Paz, Iloilo City.
Ang mga na-missing amo sanday John Ronald Linagad, 4, kag Camelle Zhynn Jareol, 5, lunsay residente sang Zone 3, Barangay Baldoza, La Paz.
Sa interview sang Bombo Radyo kay Mary Grace Centino, Assistant CSWDO Officer, iya ginpahayag nga gilayon nagpadulong ang ila talatapan sa balay sang duha ka mga kabataan agud nga obserbahan ang sitwasyon nila matapos halos isa ka adlaw nga nadula.
Suno kay Centino, natumod nga ang lalaki nga bata amo ang nakitaan sang stress, samtang ang babaye naman ang ginpapahuway matapos man nga naghingyo ang iya nga ginikanan.
Gin-athag man sini nga ipa-check ang physical kag ipa-medical ang kabataan bangud nakit-an man nga may lagob kag pilas ang lalaki nga bata.
Ginarespeto naman sang talatapan ang ginapatihan sang ginikanan nga faith healer.
Posible naman nga subong nga adlaw balikan sang mga CSWDO personnel ang duha ka mga bata sa ila nga puluy-an.
