Padayon ang paghatag sang bulig sang City Social Welfare and Development Office (CSWDO) sa mga pumuluyo nga nasunugan sa Barangay Benedicto, Jaro, Iloilo City.
Sa interview sang Bombo Radyo kay Ellen Solido, CSWDO representative sa distrito sang Jaro, iya ginpahayag nga base sa ila latest nga record, naglab-ot sa 83 ang total number sang households nga apektado, samtang 106 naman ka pamilya ukon 366 ka indibidwal ang apektado sang insidente.
Sa amo nga numero, tatlo ka balay ang partially damaged kag 80 naman ang totally damaged.
Sa karon, may 88 ka pamilya ang nagadayun sa evacuation center, nga ginabug-usan sang 317 ka indibidwal, samtang 18 naman ka pamilya ang nagatiner sa sagwa nga evacuation area nga may kabug-usan nga 49 ka indibidwal.
Nagapanawagan ang mga biktima sang sunog sang dugang nga bulig, ilabi na sa personal nga mga kinahanglanon pareho sang panapton kag iban pa nga mga gamit, bangud halos wala gid sila sang may nasalbar nga pagkabutang.
Nagpasalig man ang City Government sang Iloilo nga magahatag sang financial assistance agud makabangon kag makasugod liwat ang mga apektado nga pamilya.
