ILOILO CITY- Libuton sang City Social Welfare and Development Office (CSWDO) ang Syudad sang Iloilo agud mahibaluan kun sa diin nagatiner ang mga Badjao nga nagapangayo-kayo sa mga dalanon.
Sa interview sang Bombo Radyo kay Mr. Marlon Martinez, Focal person sang CSWDO, iya ginpahayag nga may yara na sila sang plano para sa mga Badjao nga liwat na naman nga nagbalik sa syudad.
Suno kay Martinez, plano nila nga patindugan kuntani sang shelter ang mga Badjao apang sa subong wala pa sila sang nakita nga lugar sa diin ipatindog ang shelter.
Preparado naman suno kay Martinez ang Crisis Intervention Unit (CIU) agud mag-atipan sa mga Badjao nga kabataan nga ila marescue sa paglibot man sa syudad.
Mahimo naman nga magapangatubang sang kaso ang ginikanan nga Badjao sa tion nga mapamatud-an nga ila ginagamit sa pagpangayo-kayo ang ila tagsa ka mga kabataan.
