Nag-request liwat si Iloilo City Mayor Jerry Treñas sang extension sa Department of Social Welfare and Development (DSWD) para sa tagtaganay sang cash aid sa idalom sang Special Assistance to Individuals in Crisis Situation (AICS).
Kun matandaan, Agusto 13 ang una nga deadline sa tagtaganay apang naghingyo sang extension ang syudad kag ginpalawig ini sang DSWD tubtub sa Agusto 26.
Sa interview sang Bombo Radyo kay Teresa Gelogo, head sang City Social Welfare and Development Office (CSWDO), iya ginpahayag nga kumpleto naman ang mga requirements apang naulihi pa ang schedule sa iban nga mga barangay.
Delayed ang tagtaganay suno kay Gelogo bangud magagmay ang gym kag ginalimitahan ang tawo agud nga indi mag-ginutok. Agusto 16 pa sang natapos ang Enhanced Community Quarantine (ECQ) sa Iloilo City apang ‘hulat-hulat’ lang anay liwat suno kay Gelogo.
As of press time, halos 100% naman sa mga barangay suno kay Gelogo ang nakaumpisa sa cash aid distribution; baliskad sa mga reklamo nga nabaton sang Bombo Radyo nga ligum-dulom sila gihapon bangud wala pa sang bisan isa nga nakabaton sang ayuda sa ila nga barangay bisan kumpleto pa ang dokumento nga ila napasa.
