ILOILO CITY- Siguraduhon sang Iloilo City Social Welfare and Development Office nga magakadto sa pinakaapektado nga mga residente sang syudad ang mga food packs nga ipanagtag bilang bulig sa tunga sang ginapatuman nga Enhanced Community Quarantine.
Sa interview sang Bombo Radyo kay Teresa Gelogo, CSWD Officer, iya ginpahayag nga sa subong, ginaamat-amat pa lang ang pagpanghatag sang food packs sa mga pumuluyo sang syudad.
Ang kada food pack nagaunod sang anom ka kilo sang bugas, delata kag kape nga nagabalor sang P465 kag makaigo sa sulod sang duha ka adlaw para sa isa ka pamilya nga may lima ka myembro.
Natalana naman nga mag-abot sa Western Visayas halin sa DSWD- Region 7 ang 15,000 food packs nga nagabalor P7.2M.
Sa Iloilo City, ginpahayag ni Mayor Jerry Trenas nga nagakinahanglan ang syudad sang 150,000 family food packs kada semana.
