ILOILO CITY – Mas tempranuhon sang Iloilo City Government ang curfew para sa mga menor de edad sa syudad sang Iloilo.
Sa interview sang Bombo Radyo kay Mayor Jerry Treñas, iya ginpahayag nga pirmahan na niya kag i-isyu ang executive order subong nga adlaw, Nobyembre 23, agud himuon nga 8:00 sa gab-i tubtob 4:00 sa aga ang curfew.
Sa subong, may yara sang existing order sa syudad nga 10:00 pm – 4:00 am ang curfew for minors apang sang damlag lang, may yara sang serye sang kinagamo ukon rambol nga natabo sa Plaza Libertad kag sa Sunburst Park sa Iloilo City Proper kun sa diin involved ang mga pamatan-on.
Suno naman kay Mr. Jeck Conlu, pinuno sang Public Safety and Transportation Management Office kag COVID-19 spokesperson sang Iloilo City Government, kun madakpan ang mga kabataan nga nagaliho-liho pa sa kagab-ihon, dal-on sila sa Women and Children Protection Desk sa police stations.
Exempted naman ang mga menor de edad nga kaupod sang ila guardians ukon ginikanan.
Una naman nga gin-abisuhan sang alkalde ang publiko nga tubtob lang 9:00 ang Christmas lights sa mga plaza agud malikawan ang mga kinagamo.
