ILOILO CITY – May nagainom, naga-istambay, kag nagalibot-libot nga mga tawo sa mga barangay sa syudad sa pihak sang ginpatuman nga 8:00 sa gab-i tubtob 4:00 sa kaagahon nga curfew.
Ini nga mga curfew violators ang lakip sa 47 nga nadakpan sang otoridad kagab-i, Agosto 8.
Sa interview sang Bombo Radyo kay Public Safety and Transportation Management Office (PSTMO) Head Jeck Conlu, iya ginpahayag nga out of 47, 12 ang nadakpan sang ila talatapan samtang 35 naman ang nadakpan sang Philippine National Police.
Ginkumpirma man ni Conlu nga isa ka residente sang Bo. Obrero, Lapuz ang ginhunong sa presuhan matapos naaktuhan sang mga otoridad nga nagainom sang makahulubog nga ilimnon sa higad sang dalan apisar sang ginapatuman nga liquor ban.
Madamo sa mga nadakpan suno kay Conlu ang nagarason nga wala sila nakahibalo nga mas ginpatemprano ang curfew umpisa kagab-i.
Community service ang mangin penalidad sang mga violators kag sila ang iga-deploy man agud magbulig hatag sang kinahanglanon sa mga barangay nga nakalockdown.
