Gin-eleher bilang bag-o nga presidente sang Partido Demokratiko Pilipino–Lakas ng Bayan (PDP-Laban) si Department of Energy Secretary Alfonso Cusi sa diin iya ginbuslan si Senator Manny Pacquiao.
Ini ang natabo kadungan sang national assembly sang partido.
Yara man ang presensya ni Presidente Rodrigo Duterte nga chairman sang partido sa nasambit nga assembly kag siya man ang namuno sa oath-taking sang mga bag-o nga officers.
Liwat nga ginpabutyag ni Duterte ang iya nga suporta para kay Cusi.
Suno sa presidente, wala man sang ihibalo si Pacquiao bangud wala man ini nagabasa kag kun ano lang ang ihambal sa iya, amo lang na ang iya ginasunod.
Samtang gintawag naman nga “illegal” sang mga myembro sang PDP-Laban nga nagasuporta kay Pacquiao ang pagpatigayon sang assembly sa Clark.
Pahayag ni Senator Koko Pimentel, nagapangatubang sang pagpanghangkat subong ang partido kag importante nga mapabilin nga mabakod kag may pagsalig sa liderato sa idalom sang iya ginakabig presidente nga si Senator Manny Pacquiao.
Nahibaluan nga 82 ka mga delegates ang nag-attend sa national assembly via video-conferencing magluwas sa mga physically present sa venue.
