Nagpa-Bombo ang isa ka customer nga nag-order sang lechon matapos ginapahayag nagkupos ang gin-order sini nga 50kg nga baboy.
Sa interview sang Bombo Radyo kay Alyas Jen, ang nagpa-Bombo, iya ginpahayag nga nag-order siya sang 50kg nga buhi nga baboy para sa birthday sang ila himata.
Suno kay Alyas Jen, nag-full sila bayad sa lechon sang natigayon nga nag-abot ini sa ila.
Apang, sang ginsekyar na ang lechon, natukiban nga daw kaangay nga may ginlihap ukon sliced ini kag sang ginkilo na nila, yara na lang ini sa 15 kilograms.
Nag-ekspektar man siya nga magabuhin ang kilo sang lechon apang indi tuman ka damo nga para sa iya halos wala na sang ka-tunga ang nabilin.
Sang ginkuha ang sulod sang baboy nga tanglad, natumod man nga 2 and a half kilograms ang kabug-aton sang mga tanglad.
Gin-athag man sini nga wala sang problema sa sabor bangud manamit man ini, apang ginkadismaya niya ang indi worth it nga P15,000 nga lechon.
Nagsabat naman ang lechonan nga wala sila sang mahimo bangud nga nagakupos gidman kon naluto na ang baboy.
Suno kay Alyas Jane sang Erning’s Lechonan , indi na nila control ang pagkupos sang baboy bangud native ini kon sa diin, ang unod sini ang nagapilit sa tul-an.
Gin-athag man sini nga ang P15,000 nga baboy ang 45 kilograms lamang antes nga lechonon baliskad sa 50 kg nga ginpahayag sang nagpa-Bombo.
Wala naman sila sang may mahimo sa amo nga hitabo.
Apang, nagpabutyag ang natungdan nga wala sini naluyagan ang nangin akto sang customer bangud sa mga pamuyayaw kag indi sini pagpamati sa ila nga eksplenasyon.
