ILOILO CITY – Temporaryo nga ginpasirado ang Customer Service Office sang MORE Electric and Power Corporation matapos nga nagpositibo sa COVID-19 ang isa ka empleyado.
Sa interview sang Bombo Radyo kay Jonathan Cabrera, spokesperson sang MORE Power, iya ginpahayag nga ang nagpositibo nga empleyado ang na assign sa Customer Service Office sa Hotel Del Rio rason nga ginpasirado anay ang talatapan agud nga hatagan sang ligwa ang disinfection.
Suno kay Cabrera, nakitaan sang mild symptoms ang nasambit nga empleyado kag sang nakaligad lang nga adlaw nakumpirma nga nagpositibo sa COVID-19.
Bangud sini, ginpaidalom sa quarantine ang 27 ka empleyado sang MORE Power nga may direct exposure sa COVID-19 positive kag natalana nga kuhaan sang swab sample.
Para sa mga customer nga magabayad sang electric bill, mahimo nga makabayad sa Queenbank kag sa iban pa nga payment partners sang MORE Power.
Kadungan sini, lauman ang 13 ka oras nga power interruption sa Dominggo, Oktubre 11.
Ang apektado sang power interruption amo ang mga lugar nga sakop sang Mandurriao Sub-Station kun sa diin may patigayunon nga corrective kag maintenance works.
