Na-recover na sang otoridad ang duha ka black boxes halin sa American Eagle passenger jet kag ang device halin sa helicopter matapos nagbungguanay ang duha ka aircraft sang nagligad nga Miyerkules sang gab-i.
Sandig sa National Transportation Safety Board, gina-download na subong ang data halin sa devices nga mahimo makabulig sa pagtumod kun ngaa natabo ang collision nga rason kun ngaa nahulog ang eroplano kag helicopter sa Potomac River sa Washington DC.
41 pa lamang gihapon ka bangkay ang na-recover kag indi sigurado ang otoridad kun san-o matapos ang pagpangita sa mga lawas sang 67 ka mga tawo nga ginapatihan nga lunsay nagkalamatay.
Lakip sa nakit-an na nga bangkay amo ang iya sang duha ka soldado nga sakay sa Blackhawk helicopter.
Nagpaguwa naman sang statement ang Philippine Embassy sa US nga nagakumpirma sa kamatayon ni Police Colonel Pergentino Noble Malabed Jr., head sang Directorate for Logistics’ supply management division sang Philippine National Police nga kabahin sang nakasakay sa American Airlines flight 5342.
Nagpasalig ang embahada sang assistance sa pamilya ni Malabed kasunod sang amo nga trahedya.
On official duty ang pulis sang amo nga tion particular na sa pre-delivery inspection sang 2,675 vests nga natalana baklon sang PNP.
