Nagapati ang mga otoridad nga hubog ang driver sang pick-up nga nagbunggo-patay sa isa ka iloy kag isa sini ka-tuig nga anak sa Barangay Agboy Sur, Leon, Iloilo.
Ang iloy amo si Emilyn Canonero, 25, kag ang anak sini amo si Ezekiel, lunsay residente sang nasambit nga lugar.
Samtang ang driver naman amo si Mark Angelo Lipa, 19 kag residente sang Barangay Agboy Norte, Leon.
Sa interview sang Bombo Radyo kay Police Lt. Melchor Tolentino, hepe sang Leon Municipal Police Station, iya ginpahayag nga sa malapad nga dalanon sa diin nagapanglakaton ang mag-iloy, nangin madasig ang pagpadalagan sang salakyan sang driver sa diin naga-isi-isi pa ini.
Suno kay Tolentino, nagpalagyo pa kuntani ang driver matapos nabungguan ang mag-iloy apang nadisgrasya man ang ginamaneho sini nga salakyan sa taytay sa Barangay Anonang, Leon, Iloilo.
Pahayag ni Tolentino, didto natukiban nga nagapanimaho ang driver sang makahulubog nga ilimnon.
Sa subong suno sa pulis, ginkustodiya na ang driver sa Leon Municipal Police Station samtang ginapreparar ang pila ka mga dokumento agud mapasakaan ini sang kaso nga reckless imprudence resulting in double homicide.
Samtang, nagpasalig naman sang burial assistance ang local government unit (LGU) sang Leon, Iloilo sa mga biktima.
Sa interview sang Bombo Radyo kay Leon, Iloilo Mayor Ma. Lina Holipas, iya ginpahayag nga tatlo tubtob lima ka-adlaw ang hulaton antes makalab-ot ang bulig sa pamilya.
Nagapalab-ot man sang pagpakig-unong ang LGU sang Leon, Iloilo sa mag-iloy nga ginbawian sang kabuhi.
Nagalaom man ang alkalde nga kuntani magserbe ini nga hitabo bilang leksyon para sa mga driver.
