Ginalantaw sang Department of Agriculture (DA) nga posible magnubo ang galastuhan sa pagpanguma kag magahagan-hagan ang pressure sa agrikultura sa Pilipinas kasunod sang pagbukas liwat sang Strait of Hormuz.
Suno kay Agriculture Secretary Francisco Tiu Laurel Jr., kun mabuksan na ang amo nga alagyan sang mga barko nga may karga nga langis, magabuhin man ang gasto sa inputs sa produksyon kag ang pagbyahe sang agricultural commodities.
Maayo ini nga balita suno sa DA bangud nga ginapreparahan na subong ang bag-o nga planting season.
Halin sang nagluntad ang kagamo sa Middle East sang ulihi nga bahin sang Pebrero, ginpahayag sang DA nga nagsaka gid ang gasto sa krudo, abono, kag kargamento, nga nagadugang sang pressure sa pagsaka sang presyo sang mga pagkaon.
Halimbawa, ang presyo sang urea, nga amo ang masami nga ginagamit nga abono, nag-abot sa average nga P2,629.35 kada 50-kilogram nga sako sang Hunyo 1 tubtob 5.
Ini nagtaas sang tubtob 53 porsyento kun ikumparar sa P1,711.58 kada 50-kilo nga sako sang Pebrero 23 tubtob 27 suno sa datos sang Fertilizer and Pesticide Authority.
Bangud sa pagbukas sang Strait of Hormuz, buhin ini sa problema suno sa DA kag mas makatutok subong sa problema nga ituga sang El Niño phenomenon.
Ginapaabot man suno sa tiglikom nga ang development sa tunga sang US kag Iran ang magahatag sang ligwa sa trade sa tunga sang Pilipinas kag Middle East nga amo ang major export market para sa locally produced food products.
Lakip sa nagapanguna nga gina-export sang Pilipinas sa Middle East amo ang pinya kag saging, amo man ang processed goods kaangay sang canned tuna, sardines, coconut products, kag snack foods.#
