Gin-athag sang Bureau of Plant Industry nga wala sang nagakatabo nga oversupply sang kamatis sa Pilipinas.
Kasunod ini sang nakit-an nga 500 ka kilo sang kamatis nga ginpanghaboy sa Nueva Vizcaya nga ginpahayag nagikan sa trading post sang Nueva Vizcaya Agricultural Trading.
Suno kay Department of Agriculture-Bureau of Plant Industry Spokesperson Jose Diego Roxas, isolated case lamang ang natabo.
Paathag sini, luyag sang mga manugbakal nga makapili sa medium to large kag semi-ripe. Ang natabo suno sa iya, magagmay kag overripe na ang mga kamatis sa amo nga trading post, gani ginpanghaboy na lang sa amo nga lugar bangud mas mahal kun gastuhan pa ang transportasyon kag ibalik sa ginhalinan nga farm.
Indi oversupply ang problema sa pungsod suno kay Roxas kundi kakulangan sa processing plants para maghimo sang tomato products kaangay sang tomato paste kag tomato sauce.
Ini ang rason suno sa opisyal kun ngaa nag-import ang pungsod sang processed tomato products.
Sa bahin naman sang Nueva Vizcaya, nagsabat ang Provincial Agriculturist Office nga naga-request na subong ang local government unit sa Department of Agriculture sa lista sang mga produkto halin sa iban nga probinsya agud malikawan ang oversupply sang kamatis kag iban pa nga agricultural products. ##
