Ginpamatian sang Department of Agriculture (DA) ang hingyo sang Commission on Elections (Comelec) nga patapuson anay ang eleksyon antes ang full implementation sang P20-per-kilo rice program.
Suno kay Agriculture Secretary Francisco Tiu Laurel, sa Mayo 13 maga-umpisa ang local government units sa pagbaligya sang amo sini kabarato nga bugas.
Kahapon sang ginlunsar sang ahensya ang programa sa Cebu sa pagpanguna ni Laurel nga kadungan sang komemorasyon sang Labor Day.
Nagpasalig man ang tiglikom nga bisan maatrasar ang full implementation sang pagbaligya sang bugas sa Visayas, indi man maapektuhan ang kalidad sang produkto.
Una na nga ginpaathag sang Comelec nga ipaiway anay ang implementasyon sang programa samtang wala pa nakalampas ang May 12 national and local elections agud nga malikawan ang akusasyon nga ginagamit ang programa para sa pulitika.
Ini nga pilot test sang programa ang magalawig tubtub sa Disyembre 2025. Sakop sini pati ang iban nga mga rehiyon sa Visayas kag ginalantaw nga maka-benepisyo sa 800,000 tubtub sa apat ka milyon nga mga Pilipino.
