Ginaduso sa karon sang Department of Agriculture (DA) ang pagpatuman sang price cap sa mga retailers nga nagabaligya sang imported nga bugas.
Ini agud mapunggan ang indi insakto nga pagsaka sang presyo sini sa merkado.
Suno kay Agriculture Secretary Francisco Tiu Laurel Jr., nagalab-ot na sa P55 tubtob P58 kada kilo ang presyo sang imported nga bugas sa pila ka mga retailers.
Suno sa ahensya nga ginahimo nga rason sang pila ka negosyante ang global oil shock kag krisis sa Middle East agud magpataas man ang mga ini sang presyo.
Ginpahayag ni Laurel nga indi dapat maglab-ot sa amo nga presyo ang nasambit nga produkto bangud wala pa nagataas ang gasto sa pag-import sini.
Bilang temporaryo nga tikang agud malikawan ang pagsaka sang presyo, magasumiter ang DA sang pormal nga rekomendasyon sa Malacañang para sa implementasyon sang price cap magapanagtag man ang ahensya sang bugas nga ginabaligya sa P45 tubtob P48 kada kilo.
