Ginaplano sang Department of Agriculture (DA) ang pagpataas sang buwis sa imported nga baboy.
Suno sa mga hog raisers, kinahanglan ibalik ang mas mataas nga taripa agud makakompetensya sing maayo ang lokal nga produkto kag mabuligan ang mga producer nga nagabaligya na sa idalom sang ila ginagasto sa pagpadaku sang mga baboy.
Apang, suno naman sa Meat Importers and Traders Association, mahimo ini magdugang sa presyo sang pagkaon bangod kulang pa ang lokal nga supply sang baboy kag wala pa ini makabalik sa normal nga lebel antes sang African swine fever ukon ASF.
Pahayag sang DA, gina-propose nga pagsakaon ang taripa sa imported pork sang 10 percentage points sa 2027, kag ibalik ini sa mas mataas nga lebel pagsulod sang 2028.
Dugang pa sang ahensya, ginpataas man sang gobyerno ang volume sang pork nga pwede ma-import agud indi magkulang ang supply kag mapabilin nga kontrolado ang presyo.
Sa pinakabag-o nga datos sang DA, nagnubo sa P150 kada kilo ang farmgate price sang baboy sang Agosto 2026, halin sa P215 kada kilo sang Hunyo 2025, samtang naglab-ot sa masobra P602 milyon ka kilo ang pork imports halin Enero tubtob Agosto subong nga tuig.
