Gin-anunsyo sang Department of Agriculture (DA) nga ila ginpalawig ang deadline para sa pag-isyu sang import permits sa isda kag iban pa nga mga seafoods tubtob sa katapusan sang Hunyo.
Ini nga tikang ang ginpatuman agud hatagan sang dugang nga tion ang mga importers sa pagsunod sang bag-o nga guidelines nga ginapatuman sang ahensya.
Ginmanduan ni President Ferdinand Marcos Jr. ang DA nga kay-uhon ang sistema sang fish importation agud mapa-ayo ang supply kag presyo sang isda, labi na sa sektor sang turismo kag mga high-end nga pagkaon.
Ginapanan-aw man sini nga makahatag ini sing dugang nga trabaho kag makapaganyat sang mas madamo nga mga investment sa pungsod.
Suno sa DA, gin-aprubahan na nila subong nga tuig ang importasyon sang 25,000 metric tons sang isda kag seafood para sa food service, turismo kag hospitality industries.
Sa subong, yara palang sa 25% sang nasambit nga volume ang na-import sa pungsod.
