Ginklaro sang mataas nga opisyal sang Department of Agriculture (DA) nga wala sang plano subong nga magdeklarar sang food security emergency sa Pilipinas.
Ini bangud wala man sang kakulangan sa suplay sang bugas kag wala man sang nakit-an nga indi kinaandan nga pagsaka sa presyo.
Suno kay Agriculture Assistant Secretary kag spokesman Arnel de Mesa, makahimo lamang ang ahensya sang deklarasyon ukon ma-invoke ang Section Six sang Republic Act 12078 ukon Agricultural Tariffication Act kun makit-an na ini nga duha ka mga kondisyon.
Dugang sini, nakitaan gani subong sang pagnubo ang presyo sang bugas base sa latest release sang Philippine Statistics Authority (PSA) sa inflation.
Ginalantaw man suno sa iya nga maga-us-os pa gid ang retail price sang bugas bangud nagnubo naman ang presyo sa international market.
“We also expect that the local production will recover this year, barring any major calamity issue, but looking at all possibilities, we could have a good harvest for the year,” pahayag ni De Mesa.
Sang 2024, nagdangat ang total palay output sa 19.3 million metric tons samtang ang imported rice naman nagdangat sa malapit sa 4.7 MMT.
