Ginalantaw sang Department of Agriculture (DA) nga temporaryo nga ipa-untat ang pag-import sang bombay umpisa sa Pebrero sa masunod nga tuig.
Ini agud nga mas mahatagan sang prayoridad ang lokal nga harvest kag maprotektahan ang kita sang mga mangunguma samtang ginasiguro nga wala man gina-disrupt ang suplay sa merkado.
Suno kay Agriculture Secretary Francisco Tiu Laurel Jr., ipatuman ang suspensyon sang importasyon isa ka bulan antes ang peak harvest period.
Tuyo sini nga malikawan ang pag-sobra-sobra sang mga suplay.
Una na nga ginkumpirma sang tiglikom nga gintugutan sang ahensya ang importasyon sang white kag red onions agud nga mapa-us-os ang presyo sang amo nga mga produkto.
Sa datos sang Philippine Statistics Authority (PSA) sa tuig 2020, ang mga lugar nga may pinakalapad nga talamnan sang bombay sa Pilipinas amo ang Ilocos, Cagayan Valley, Central Luzon, Mindoro, Marinduque, Romblon, kag Palawan.
