Pormal na nga nagkoordinar ang Department of Agriculture kag Sugar Regulatory Administration sa nagkalain-lain nga ahensya sang gobyerno, ilabi na sa Department of Energy, agud masiguro ang nagakaigo nga suplay sang produktong petrolyo kag fertilizer.
Ini agud indi maparalisa ang produksyon sang kalamay sa pungsod kag agud maprotektahan ang mga mangunguma batok sa posible nga kakulangan kag pagsaka sang presyo sang gatong kag abono bangod sa padayon nga gyera sa Middle East.
Ginkumpirmar man ni SRA Administrator Pablo Luis Azcona nga ginpabutyag na nila kay Agriculture Secretary Francisco Tiu Laurel Jr. ang sitwasyon agud pormal nga mapalab-ot sa DOE ang ginakabalak-an sang bug-os nga industriya sang kalamay.
Ginpabutyag naman ni Laurel nga handa ang gobyerno nga magbulig kag indi nila pagtugutan nga ma-delay ang operasyon sang sektor.
Dugang pa sini, indi lamang ang mga producer sang kalamay ang ila protektahan kundi pati man ang bug-os nga suplay sang gatong kag abono para sa tanan nga mangunguma kag mangingisda sa bug-os nga pungsod.
