Nagapatuman na sang mga tikang ang Department of Agriculture (DA) agud mabuligan ang mga mangunguma kag manugpangisda sa Western Visayas batok sa ginalauman nga epekto sang El Niño sa ulihi nga mga bulan sang tuig.
Sa interview sang Bombo Radyo kay DA Undersecretary Cheryl Marie Caballero, iya ginpahayag nga padayon ang pagpakigsapol nila agud siguraduhon ang gilayon nga pagpatuman sang mga programa nga magasuporta sa mga apektado nga sektor.
Suno sa iya, pila sa mga tikang amo ang paghatag sang fuel subsidy nga mahimo nga gamiton indi lamang sa transportasyon kundi pati sa patubig.
Suno pa kay Caballero, ang pagtaas sang temperatura tuga sang El Niño ang mahimo magpadasig sa pag-mature sang mga pananom, nga magaresulta sa mas temprano nga harvest kag posible nga pagdamo sang suplay sang mga ulutanon sa merkado.
Dugang niya, ginatun-an sang ahensya ang mga programa nga makabulig sa food processing agud malikawan nga mauyang ang mga pagkaon.
Suno sa opisyal, katuyuan sang mga tikang nga ini nga mapabilin ang palangabuhian sang mga mangunguma kag manugpangisda, mapanubo ang gasto sa produksyon, kag masiguro ang bastante nga suplay sang pagkaon sa tunga sang epekto sang El Niño.
 agud mabuligan ang mga mangunguma kag manugpangisda sa Western Visayas.){kind=link}