ILOILO – Daku ang katungdanan sang hog raisers agud nga matapna ang African Swine Fever sa pungsod.
Ini ang kasunod sang pagdeklarar sang outbreak sang African Swine Fever sa pila ka lugar sa Luzon.
Sa interview sang Bombo Radyo kay Dr. Jonic Natividad, Regulatory Division Chief sang Department of Agriculture 6, iya ginpahayag nga wala pa sang may na-record nga African Swine Fever sa Western Visayas apang indi dapat nga magkampante ang hog raisers.
Suno kay Natividad, madasig nga maglapta ang nasambit nga balati-an bangud nga wala pa sang bakuna para diri.
Ginpahayag ni Natividad nga indi man malayo nga makalab-ot sa Western Visayas ang African Swine Fever bangud sa mga meat products nga gina-supply sa rehiyon.
Panugyan ni Natividad, gilayon nga ipahibalo sa pinakamalapit nga Municipal Agriculturist ukon Veterinarian kun may yara sang nagkalamatay nga baboy nga nakitaan sang sintomas sang African Swine Fever agud nga gilayon ini nga maaktuhan.
Lakip sa mga palatandaan nga may yara sang African Swine Fever ang isa ka baboy amo ang hilanat nga madasig nga maglaton kag nagaresulta sa kamatayon sang mga baboy.
