Luyag sang Department of Agriculture (DA) nga himuon sang apat kag pilo ang ila budget sa masunod nga tuig agud mapasangkad ang suporta sa mga mangunguma.
Suno sa ahensya, pinaagi sa sini nga lihok, mabuhinan ang pag-import sang mga produkto.
Base sa Philippine Council for Agriculture and Fisheries (PCAF), ang DA-NCP nagapangayo sang masobra 300% nga pagtaas sang ila budget sa masunod nga tuig halin sa subong nga P5 billion nga alokasyon.
Ang mas mataas nga budget ang gamiton para pabaskugon ang mga serbisyo para sa produksyon bilang parte sang mga paghimakas sang ahensya nga mapanami ang local nga produksyon kag mabuhinan ang pag-import sang mais.
Suno kay Milo delos Reyes, director sang DA-NCP, ang mas mataas nga budget ang makapasigurado sa paghatag mas madamo nga mga binhi kag fertilizer sa mga mangunguma sa bilog nga pungsod.
Ginpahayag ni Delos Reyes nga plano sang ahensya nga maglunsyar sang isa ka programa nga makabulig sa pagpataas sang kita sang mga mangunguma sang mais kag iban pa.
