Nagpatukod ang Department of Agriculture (DA) sang Interim Social and Environmental Safeguards (SES) Unit agud masiguro ang transparent kag responsable nga pagpatuman sang ila mga infrastructure projects.
Suno kay DA Secretary Francisco Tiu Laurel, Jr., importante ang tikang nga ini ilabi sa pagsaylo sang farm-to-market road (FMR) projects halin sa Department of Public Works and Highways umpisa 2026, kag bilang sabat sa flood control scandal.
Nahibaluan nga masobra sa 60,000 km sang kabug-usan nga 131,000 km sang FMR network ang wala pa napatindog.
Magluwas sa FMRs, tinutuyo man sang DA nga palaparon ang agriculture infrastructure projects pinaagi sa food hubs, cold storage, kag rice mills.
Ginpunto man sang SES Unit ang pagsunod sa mga national regulation sang gobyerno amo man ang guideline sang mga development partner, kag siguruhon may proteksyon man sa palibot kag kumunidad ang kadad proyekto.
