Nagmandu na si Agriculture Secretary Francisco Tiu Laurel Jr. sa National Food Authority (NFA) nga umpisahan ang pagsaylo sang stocks sang bugas sa Visayas bilang preparasyon sang paglunsar sang P20-per-kilo rice program.
Ini kasunod sang kumpirmasyon sang Commission on Elections (Comelec) nga ginhatagan sini sang exemption ang proyekto sang DA sa election spending ban kaangot sa nagahilapit nga May 12 national and local elections.
Suno sa DA, kuhaon ang suplay halin sa buffer stocks sang NFA nga nakalab-ot sa five-year high nga 7.17 million 50-kilogram bags sang milled rice.
As of the latest data, ang inventory nagsaka pa sa 7.56 million bags nga bastante na nga mapakaon ang pungsod sa 10 ka adlaw.
Suno pa sa DA, sinemana pa kalawigon sang pagsaylo sang ginatos ka libo nga 50-kilo bags halin sa NFA warehouses, partikular sa Mindoro, pakadto sa nagkalain-lain nga parte sang Visayas.
Bisan pa nga mas bastante nga suplay halin sa NFA warehouses sa Iloilo nga lab-ot sa 862,409 ka sako sang bugas, ginsiling ni NFA Administrator Larry Lacson nga kinahanglan magbyahe sang additional stocks halin sa Mindoro agud masuportahan ang areas nga may limitado nga rice production kaangay sang Cebu, Negros Island, Samar, kag Leyte.
