Ginpangabay sang Department of Agriculture (DA) sa Department of Budget and Management (DBM) nga ipagwa na ang nabilin nga pondo halin sa rice tariff collections sang nagligad nga tuig nga nagalab-ot sa kapin P24 billion.
Suno kay Agriculture Assistant Secretary kag spokesperson Arnel de Mesa, nagalaum ang DA nga ipagwa na ang alokasyon subong nga quarter agud nga mapuslan sang mga mangunguma sa tion pa lang sang dry season.
Ang rice tariff collections ang kabahin sang Rice Competitiveness Enhancement Fund nga nagatuyo nga mapa-uswag kag ma-modernisar ang lokal nga industriya sang humay.
Suno sa Bureau of Customs, may total nga P34.23 bilyon nga rice tariffs sang tuig 2024 nga mataas sang 14% ipaanggid sa P29.93 bilyon sang 2023.
May yara na sang P10 bilyon para sa RCEF sa idalom sang General Appropriations Act 2025 kag na-release na ini sa DA.
Bangud sini, may balanse nga P24.23 bilyon.
Ginpahayag pa ni De Mesa nga P9 bilyon ang ipatupa para sa programa sa mekanisasyon kag P6 bilyon para sa inbred rice seeds halin sa total rice tariffs nga nakuha sang nagligad nga tuig.
Dugang pa, nagsumiter na ang DA sang ila proposal para sa pagbahin-bahin sang nabilin nga P19.23 bilyon nga rice tariff collections. Ini ang ipanagtag sa pito ka mga programa nga amo ang training, pinansyal nga bulig, credit access, composting facilities, pest management, solar-powered irrigation, kag soil health improvement.#
