Ginalantaw sang Department of Agriculture (DA) nga posible magpanaog pa sa P60 per kilo ang presyo sang kalamay sa Pilipinas.
Suno kay newly installed Agriculture Senior Undersecretary Domingo Panganiban, mahimo maimpluwensyahan sang P70-per-kilo sugar nga ginabaligya sa major supermarkets ang retail prices sa mga merkado.
Kun matandaan, sang weekend, nagsugot ang mga tag-iya sang SM Supermarket, Robinsons Supermarket, kag Puregold sa suggested retail price nga P70 per kilogram sa kalamay epektibo na subong nga semana.
Suno kay Panganiban, kun naganubo ang presyo sa supermarkets, ginalauman na nga magasunod ang iban nga mga merkado.
Magluwas diri, ginalauman man nga magapatigayon ang gobyerno sang inspeksyon sa dugang nga warehouses agud nga mapataas ang sugar supply kag mapanubo ang presyo sini.
Kasunod sang pag-check sang warehouses sa Luzon, ginalauman suno kay Panganiban nga iga-sunod na ang Mindanao kag Eastern Visayas.
Sa subong desisyunan pa sang DA kun ano ang himuon sa kalamay nga nakuha gikan sa warehouse raids, apang ginpahayag man sang nasambit nga DA official nga kun ibaligya ang amo nga suplay sa merkado, posible nga makabulig ini agud mapanubo ang sugar price.
Kun basehan ang joint memorandum sang Sugar Regulatory Administration (SRA) kag Bureau of Customs, ang abandoned ukon forfeited sugar ang mahimo lamang nga ma-dispose paagi sa public auction nga patigayunon sang BOC nga may coordination sa SRA. ##
