Opisyal nga ginlunsar sang Department of Agriculture (DA) ang Agri-Puhunan kag Pantawid Program (APP), isa ka inisyatibo sang gobyerno nga nagahatag sang manubo nga interes nga pautang kag pinansyal nga bulig para sa mga mangunguma.
Ginpangunahan mismo ni President Ferdinand “Bongbong” Marcos Jr. ang seremonya sa Alabel, Sarangani.
Pinaagi sa APP, ang mga mangunguma pwede makahulam tubtob ₱60,000 kada cropping season nga may 2% nga annual interest rate.
Mabayaran nila ini paagi sa pagbaligya sang ila produkto sa National Food Authority (NFA) ukon sa mga kooperatiba nga accredited sang DA.
Magahatag man ang programa sang ₱8,000 nga subsistence allowance sa sulod sang apat ka bulan, halin sa pagtanom tubtob sa pag-ani.
Makabaton man ang mga benepisyaryo sang Intervention Monitoring Cards nga magaserbe bilang voucher para sa pagbakal sang mga farm inputs halin sa mga accredited nga suppliers.
Bilang dugang nga suporta, gin-anunsyo man ni Marcos ang pagpanghatag sang makinarya sa agrikultura, lakip na ang mobile disinfection truck kag forage chopper, agud mabuligan ang mga mangunguma nga mapasangkad pa ang ila produksyon kag kita.
