Ginaplano sang Department of Agriculture (DA) nga magpatuman sang restrictions sa importasyon sang karne sang baboy sa una nga semana sa masunod nga bulan.
Suno kay Agriculture Secretary Francisco Tiu Laurel Jr., ginakonsiderar sang ahensya nga untaton anay sa sulod sang 30 tubtob 60 ka adlaw ang pag-isyu sang sanitary and phytosanitary import clearances para sa pila ka produkto sang baboy nga ginapasulod sa pungsod.
Lakip sa mga posible nga dumilian amo ang pork belly, iban pa nga parte sang baboy, kag bilog nga baboy.
“I’m thinking of the total halt of several pork cuts for a minimum of 30 days to a maximum of 60 days, but only the SPSICs, because we can’t stop incoming [shipments] that have already been purchased, since it will disrupt business,” suno sa tiglikom.
Ini ang ginakonsiderar sang DA bangud sa kabalaka nga ang nagadamo nga pork imports nagahatag sang peligro sa palangabuhian sang mga lokal nga hog raiser.
Suno kay Tiu Laurel, ginahimo sang ahensya ang tanan nila nga mahimo agud temporaryo nga malimitahan ang pagsulod sang imported nga karne sang baboy, kag agud makabangon liwat ang lokal nga industriya kag malikawan ang dugang nga kapiedehan sang mga mangunguma.
Dugang niya, bisan ano nga desisyon kaangot sa restriction, kinahanglan anay nga magpaidalom sa legal review kag makakuha sang nagakaigo nga pag-aprubar sang gobyerno.
Samtang, ginarepaso sang Tariff Commission ang petisyon sang DA nga pataason ang taripa sa imported nga karne sang baboy agud maprotektahan ang lokal nga mga producer.
Suno sa datos sang Bureau of Animal Industry, naglab-ot sa 602,655 metric tons ang importasyon sang karne sang baboy sang Agosto nga mas mataas sang lima ka porsyento.
Ginatudlo sang mga lokal nga hog producer ang nagadamo nga imported nga karne sang baboy bilang rason sa padayon nga pagnubo sang farmgate prices ukon presyo sang baboy sa tion nga ginabaligya ini sang mga producer. Nagresulta ini sa nagadugang nga kapierdehan sang mga mangunguma.
